محمد آل زارب ..


أبيات يقول فيها :

ياحسن من صغر سني وأوله *** مالقيت إلا عنا يردف عنا

ياحسن وش حيلة الي مادله *** لاغفت عينه ولاجفنه هنا

ويل وآله من زمان ٍ يخذله *** كل ما يبني يطيح الي بنا

وكل ماجاته تجيه محوّله *** لانفع صبره ولاحقق منا

لي عدو ٍ يارفيقي وأجهله *** لاهرب مني ولاحنّ ودنا

حظ ٍ أقشر كل مابي زلزله *** وش يفيده من عذابي وش جنا

أحسبه مثلي وبالطيب ادهله *** واثر طبعه مثل ماهو ما انثنا

لااستحى مني ولا الطيب اخجله *** لاعب ٍ فيني حسيبه ربنا

جيشه اصدوف الليال الممحله *** والليالي جيش مايرفق بنا

ويش اسوي والبلاوي مقبله *** والأماني كل ابوها للفنا

فكان ردي

ياهلا يامن ملا قلبي وله *** ياعضيد اللي بحالته الونا

يابن زارب حرب خصمك جلجلة *** وانت عضبٍ بالأسنة والقنا

لابرق وجهك على الصعب اذهله *** ولذة العيش الهني بعد العنا

يدخل السيف المسن ويصقله *** والحياة المترفة ماهي لنا

والصبر ياصاحبي يامجمله *** هذا هو سر السعادة والمنى

والكفو شرواك ماهو يشغله *** كل ما طاح البنا قام وبنا

والخلايق بعضهم يامنذله *** يضحك بسنٍ ونابه انحنى

ذاك لاشفته ضحوكٍ فاتفله *** ولايهمك جعل عمره للفنا

وان تطيع الشور مني فازهله *** لاسقي من دمه التراب اللي دنا

والليالي كلها لك مقبلة *** دام عينك ترتجي من ربنا

والاماني حلم واحنا نأمله *** والنفوس الصامله ماتوهنا

هذي الدنيا تراها مهزلة *** نطرد الدنيا وهي من خلفنا

مير لاتنسى الكفو من منزله *** يالكفو قرب هنا قرب هنا

عدد الزيارات :30610

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *